დღეს ევა ბაბალაშვილის საავტორო გადაცემა „წახნაგები“-ს სტუმარია ღამის ეკონომიკის განვითარების კონცეფციის პროექტის ხელმძღვანელი სერგი გვარჯალაძე

ევა ბაბალაშვილი - მოგესალმებით! ეთერშია გადაცემა „წახნაგები“ და ჩვენთან სტუმრადაა მრავალი ნიჭით დაჯილდოებული ადამიანი, ნამდვილი „ტელევიზიონშიკი“, რომელიც ამჟამად დაკავებულია ღამის თბილისით და არის ღამის ეკონომიკის განვითარების კონცეფციის პროექტის ხელმძღვანელი. დღეს ჩვენთან სტუმრადაა სერგი გვარჯალაძე. მოგესალმებით!

სერგი გვარჯალაძე - მოგესალმებით! ძალიან სასაიმოვნოა თქვენთან საუბარი.

ევა ბაბალაშვილი - სერგი, ბევრ ჩვენს მაყურებელს ახსოვხარ ტელევიზიის პირველი არხიდან, როდესაც მიგყავდა საავტორო გადაცემა „კომუნიკატორი“. ეს გადაცემა ღამის ეთერში გადიოდა. რატომ გიყვარს ღამის საათები?

სერგი გვარჯალაძე - ყველაზე სასაცილო ის არის, რომ ყველას ჰგონია, რომ ღამის საათები მიყვარს. სინამდვილეში, ღამე არ მიყვარს, რადგან დილის ადამიანი ვარ. მიყვარს დილით მუშაობა, მაგრამ ისე მოხდა, რომ ყველაფერი, რასაც ვაკეთებდი, ღამეს უკავშირდებოდა. ახლაც ყველას ჰგონია, რომ ამით იმიტომ ვარ დაკავებული, რომ კლუბებში და რესტორნებში სიარული მიყვარს. სინამდვილეში მთელი მუშაობა მიდის დღის განმავლობაში. რაც შეეხება იდეებს და ქაღალდის სამუშაოს, ამით დილით ვარ ხოლმე დაკავებული. ღამე გავდივარ გარეთ და ვაკვირდები, რა ხდება ქალაქში, რა პრობლემებია... ზოგჯერ ვხვდები სხვადასხვა კლუბების, რესტორნების, სატრენაჟორო დარბაზების მფლობელებს ან მენეჯერებს. თბილისში გაჩნდა სატრენაჟორო დარბაზები, რომლებიც 24 საათი მუშაობენ. ეს ძალიან კარგია, რადგან ადამიანებს ესმით, რომ ბევრს არ გააჩნია დრო სპორტისთვის, მაგრამ ისინი ამისათვის ღამის საათებს იყენებენ. ადრე ვერავინ წარმოიდგენდა, რომ ღამის ცხოვრება შეიძლება უკავშირდებოდეს სპორტს ან ჯანსაღ ცხოვრებას. ახლა ეს ახალი ტენდენციაა, რადგან ახალგაზრდები დადიან ამ სატრენაჟორო დარბაზებში არა მხოლოდ იმისთვის, რომ ივარჯიშონ, არამედ ეს არის ურთიერთობაც. ჩვენ ამას მივესალმებით და გვინდა ამას მხარი დავუჭიროთ.

ევა ბაბალაშვილი - თბილისი - განსაკუთრებული ქალაქია. ის ძალიან განსხვავდება სხვა ქალაქებისგან, აქ სხვა მენტალობაა. რისი ნახვა სურთ აქ ტურისტებს?

სერგი გვარჯალაძე - პირველ რიგში მათ სწორედ ეს მენტალობა იზიდავს და, რა თქმა უნდა, ქალაქის ატმოსფერო, რომელიც მას ჯერ კიდევ შემორჩა. კიდევ ძალზე მნიშვნელოვანია დამოკიდებულება სტუმრების მიმართ. ვფიქრობ, რომ სტუმრებს იზიდავს ხალხი და არა შენობები და რაღაც განსაკუთრებული სერვისი. რა თქმა უნდა, არის რაღაც მინიმუმი, რომელიც აუცილებლად უნდა იყოს - და ეს სწორედ ის არის, რაზედაც ჩვენ ვცილობთ ვიზრუნოთ ამ პროექტის ფარგლებში.

ევა ბაბალაშვილი - ჩვენში ვის გულისხმობთ?

სერგი გვარჯალაძე - ოფიციალურად - ეს მე ვარ - ქალაქის მერის ერთადერთი მრჩეველი ამ საკითხში, მაგრამ უნდა გითხრათ, რომ ჯგუფი საკმაოდ დიდია, რადგან მუნიციპალიტეტის ყველა სამსახურთან მიწევს მუშაობა. თუ ეს არის საკითხი, მაგალითად, ღამის ავტობუსის, რომელიც მანამდე არ იყო (თუ არ ჩავთვლით აეროპორტს), ახლა უკვე ერთი წელია რაც გაგვაჩნია ღამის ავტობუსი, რომელიც პარასკევს და შაბათს მთელი ღამე ქალაქის ცენტრალურ ნაწილში მოძრაობს. ჩვენ ვცდილობთ ამ ტრანსპორტის პოპულარიზაცია მოვახდინოთ, რადგან ხალხს ჰგონია, რომ თუ საღამოს კლუბში წავლენ, შემდეგ უკან დაბრუნების პრობლემა შეექმნებათ, ან ტაქსის აყვანა მოუწევთ. სინამდვილეში ეს სუფთა და კომფორტაბელური ავტობუსებია. ვფიქრობ, რომ ავტომობილებს ცოტა უნდა გადავეჩვიოთ. უნდა ვიზრუნოთ ეკოლოგიაზე და ტრანსპორტის სხვა სახეობებზე გადავიდეთ.

ევა ბაბალაშვილი - თუნდაც ველოსიპედზე...

სერგი გვარჯალაძე - თბილისში ეს ცოტა რთულია, მაგრამ ჩვენთან უკვე არის რაიონები, სადაც შესაძლებელია ველოსიპედით მოძრაობა. ვფიქრობ, რომ ასეთი რაიონი უფეო მეტი და მეტი იქნება.

ევა ბაბალაშვილი - ჯერჯერობით ადამიანებს ეშინიათ ველოსიპედით სიარული. აქ სხვა მენტალობაა. მათ მიაჩნიათ, რომ თუ სამსახურში ველოსიპედით მივლენ, ეს ცოტა უხერხული იქნება.

სერგი გვარჯალაძე - დღევანდელი თაობისთის ეს ნორმალურია. ისინი მშვიდად უყურებენ იმას, რომ ხელმძღვანელ პირს შეუძლია სამსახურში ველოსიპედით მივიდეს.

ევა ბაბალაშვილი - ხშირად აჩვენებენ სხვა ქვეყნების პრეზიდენტებს ან პარლამენტარებს, რომლებიც სამსახურში ველოსიპედით მიდიან.

სერგი გვარჯალაძე - ეჭვი მეპარება, რომ ჩვენი დეპუტატები ველოსიპედებზე გადაჯდებიან, მაგრამ ეს აუცილებლად მოხდება, რადგან თაობა, რა თქმა უნდა, იცვლება. ეს თაობა უფრო სპორტულია და მათ ესმით, რომ ჯანმრთელობას დიდი მნიშვნელობა აქვს.

ევა ბაბალაშვილი - მე მიყვარს დღევანდელი ახალგაზრდობა. დღევანდელი ახალგაზრდობა უფრო განათლებულია. ისინი უფრო დამოუკიდებლები არიან და სამყაროს სხვანაირად უყურებენ.

სერგი გვარჯალაძე - რა თქმა უნდა, ეს აბსოლუტურად სხვა თაობაა. ისინი კომუნიკაციების სამყაროში ცხოვრობენ და მსოფლიო მათთვის ბევრად უფრო პატარაა, ვიდრე თუნდაც ჩემი თაობისთვის იყო. 13 წლის ასაკში ვერც წარმოვიდგენდი, რომ ვიცხოვრებდი ლივერპულში ან გერმანიაში. მაშინ მეგონა, რომ ვერასდროს წავიდოდი სხვა ქვეყანაში. კომუნიკაციამ და ინტერნეტმა შეცვალეს სამყარო. გარდა ამისა, ახალგაზრდობა მთელს მსოფლიოში აცნობიერებს, რამდენად მნიშვნელოვანია ეკოლოგია, რამდენად კრიტიკულია კლიმატის ცვლილებეთან დაკავშირებული სიტუაცია.

ევა ბაბალაშვილი - შენ კომუნიკაცია ახსენე... ამასთან დაკავშირებით, მინდა გკითხო შენს გადაცემაზე „კომუნიკატორი“, რომელიც პირველ არხზე გადიოდა.

სერგი გვარჯალაძე - „კომუნიკატორი“ - ეს იყო იმ სატელევიზიო მუშაობის შედეგი, რომელსაც 80-იანი წლების ბოლოს მეორე არხზე ვაკეთებდი. მაშინ დაიწყო „პერესტროიკა“ და ეთერში ახალგაზრდობა შეუშვეს. შემდეგ წავედი გერმანიაში. საერთოდ, ტელევიზიაში 10 წლის ასაკიდან ვარ. მე ვმღეროდი ფოლკლორულ ანსამბლში, ასევე ჩემს დასთან ერთად ვმონაწილეობდი ერთ-ერთ საბავშვო გადაცემაში, თუმცა ეს მაინცდამაინც არ მიყვარდა. ჩემთვის ეს დღემდე ძალიან რთულია. როდესაც ეთერში ან სცენაზე ვარ, ჩემთვის ეს სერიოზული ბარიერია, „კომუნიკატორში“ კი ეს ბარიერი უკვე აღარ მქონდა, რადგან იმ დროისთვის უკვე გერმანიაში მუშაობის გამოცდილება მქონდა. სტუდენტობის პერიოდში იქ სხვადასხვა არხზე ვიმუშავე და პროფესიული განვითარების საშუალება მქონდა. ჩემს გერმანელ მეგობართან ერთად ერთ-ერთ გერმანულ არხზე ვაკეთებდი გადაცემას, რომელშიც ავანგარდულ მუსიკალურ ჯგუფებს წარვადგენდით. იქვე პირველად გავეცანი ელექტრონულ მუსიკას. როდესაც ამსტერდამში მივფრინავდი, აეროპორტში შემთხვევით ვნახე ზაზა შენგელია, რომელიც მაშინ პირველი არხის ხელმძღვანელი იყო. მან მითხრა, რომ არის შესაძლებლობა, რომ პირველ არხზე საკუთარი გადაცემა გავაკეთო. მე მივედი ჩემს ლექტორთან, რომელმაც შემომთავაზა ამ გადაცემის საფუძველზე სადიპლომო ნამუშევარი გამეკეთებინა. ასე დავბრუნდი თბილისში. ერთი წლის შემდეგ მე უკვე მქონდა ჩემი კომპანია, რომელშიც დაახლოებით 50 ადამიანი მუშაობდა. ჩვენ რამდენიმე გადაცემას ვაკეთებდით. ამის შემდეგ ვმუშაობდი ცდფ-ის არხისთვის და პოლონეთის ტელევიზიისთვის.

ევა ბაბალაშვილი - პოლონურ ენაზე? რამდენი ენა იცი?

სერგი გვარჯალაძე - პოლონური ცოტა ვიცი. იქ ძირითადად პროდიუსირებით ვიყავი დაკავებული. ჩვენ გავაკეთეთ რამდენიმე გადაცემა პოლონეთის ტელევიზიისთვის, რადგან ძალიან წარმატებული გამოვიდა პროექტი საქართველოზე, რომელსაც „საქართველოს ცეკვა“ ეწოდებოდა. ჩვენ გადავიღეთ სერიალი, რომელიც შემდეგ საქართველოშიც გადიოდა. მასში მონაწილეობდა ცნობილი პოლონელი მსახიობი, რომელსაც ქართული ცეკვის სწავლა სურდა. შემდეგ ის აქ მოვიწვიეთ. მე გავესაუბრე ნინო რამიშვილს და ჩვენ გამოგვივიდა საკმაოდ დიდი ნაწილი, სადაც ის სწავლობს ქართულ ცეკვას.

ევა ბაბალაშვილი - ეს სერიალი ტურისტებზე იყო გათვლილი?

სერგი გვარჯალაძე - მაშინ არავინ ფიქრობდა საქართველოს პოპულარიზაციაზე ტურიზმის კუთხით. ეს იყო 2008 წელი. ჩვენ მაშინ შვიდი რეგიონი გადავიღეთ. ეს იყო პრაქტიკულად მისი მოგზაურობა მთელს საქართველოში.

ევა ბაბალაშვილი - გირჩევთ რომ ნახოთ ეს ძალიან საინტერესო დოკუმენტური ფილმი. იმ დროიდან, რაც ეს ფილმი გადაიღეს, საქართველოში ბევრი რამ შეიცვალა.

სერგი გვარჯალაძე - საქართველოში ბევრი რამ შეიცვალა. არ მიყვარს ჩემი ფილმების ყურება, მაგრამ რამდენიმე თვის წინ ერთ-ერთ ფილმში რაღაც უნდა მეპოვა და როდესაც ვნახე, რადიკალურად სხვა ქვეყანა გამოვიდა. მერე მითხრეს, რომ პოლონეთიდან ტურისტების რაოდენობა ფილმის ნახვის შემდეგ 25%-ით გაიზარდა. ალბათ, არის რაღაც კავშირი იმ პროექტსა და ჩემს დღევანდელ სამუშაოს შორის. მე მივხდი, რამდენად არის ეს მნიშვნელოვანი.

ევა ბაბალაშვილი - ისეთი შეგრძნება მაქვს, რომ ყველაფერი, რაც შენს ცხოვრებაში ხდება, მიდის იქითკენ, რომ აჩვენო დანარჩენ სამყაროს, რა არის საქართველო, როგორ ცხოვრობს... შენი დღევანდელი საქმიანობა ასევე ამ პროცესს ემსახურება. ეს სამუშაო რთულიც არის და, ამავე დროს, ძალიან საინტერესოც.

სერგი გვარჯალაძე - ყველაზე დიდი სირთულე - ეს არის აუხსნა ჩვენი ქალაქის მაცხოვრებლებს, რატომ არის ეს მნიშვნელოვანი. ფაქტიურად, თქვენ აფინანსებთ ჩემს სამუშაოს, ამიტომ მე მუდმივად უნდა გიხსნიდეთ იმას, თუ რაში ვიღებ ამ ხელფასს. ეს ძალზე მნიშვნელოვანია, რადგან ჩვენ ვცხოვრობთ დემოკრატიულ ქვეყანაში და ადამიანი, რომელიც ხელფასს ბიუჯეტიდან იღებს, აუცილებლად ანგარიშვალდებული უნდა იყოს. მე მიმაჩნია, რომ ეს სწორია. მეორე ძალიან მნიშვნელოვანი საკითხი - რაც შეიძლება მეტი სამუშაო ადგილის შექმნა, რადგან ტურიზმი - ჩვენი ეკონომიკის ძირითადი დრაივერია.

ევა ბაბალაშვილი - სერგი, ხომ არ გაგჩენია აზრი, რომ საქართველოზე ახალი დოკუმენტური ფილმი გადაგეღო? შენ ხომ თქვი, რომ ის სერიალი უკვე დაძველდა?

სერგი გვარჯალაძე - დოკუმენტური კინოს ჟანრი ძალზე მნიშვნელოვანია. ჩვენ აქცენტს არა ფილმებზე, არამედ ხალხზე ვაკეთებთ. ესენი ე.წ. ინფლიუენსერები არიან, რომლებიც ჩამოგვყავს ქალაქში, რომლებსაც აქვთ YOUTUBE-არხები, გააჩნიათ საინტერესო პროექტები ინტერნეტში. ჩვენ ვცდილობთ მივცეთ მათ საშუალება უამბონ ჩვენი ისტორია. ძირითადად, ეს ადამიანები ძალიან ცნობილები არიან ინტერნეტში. მათ არხებს მილიონობით ადამიანი უყურებს.

ევა ბაბალაშვილი - მე ვიცი, რომ ძალიან გაინტერესებთ ელექტრონული მუსიკა და ხართ ფონდის დამფუძნებელი. მოგვიყევით ამაზე.

სერგი გვარჯალაძე - ეს არის „ინოვაციური პოპ-კულტურის განვითარების ფონდი“. ეს არის ის კულტურა, რომელიც არის ავანგარდული და არაორდინალური. ჩვენ ვცდილობდით, რომ ამ არაორდინალურისთვის მხარი დაგვეჭირა, რადგან, მიუხედავად იმისა, რომ არ მიყვარს დაჯილდოებები, ჩვენ გადავწყვიტეთ მოგვეწყო შეჯიბრი. ხელოვნებაში ეს ცოტა უცნაურია, მაგრამ ჩვენ მივიჩნიეთ, რომ ეს ძალიან კარგი სტიმული იქნება. ამას უკვე 11 წელია ვაკეთებთ. ამ დაჯილდოებას ჰქვია „ელექტრონავტი“. თბილისი უკვე რამდენიმე წლის მანძილზე ელექტრონული მუსიკის ერთ-ერთ ცენტრს წარმოადგენს. ამ მუსიკას არ გააჩნია საზღვრები. ჩვენი ელექტრონული სცენა საკმაოდ აქტიურია სოციალურ ცხოვრებაში.

ევა ბაბალაშვილი - თუმცა ელექტრონულ მუსიკას ბევრი მოწინააღმდეგეც ჰყავს...

სერგი გვარჯალაძე - დიახ, რადგან არის გარკვეული ნეგატიური მხარეები, მაგრამ სინამდვილეში ამაში განსაკუთრებული არაფერია. ეს მუსიკა დღეს პრაქტიკულად მთელ სამყაროს აერთიანებს.

ევა ბაბალაშვილი - რატომ?

სერგი გვარჯალაძე - იმიტომ რომ ადრე მუსიკა რომ შეგექმნა, მუსიკალური შვიდწლედი უნდა დაგემთავრებინა, დღეს კი ტექნოლოგია იძლევა საშუალებას საკუთარი ნიჭისა და კრეატიული იდეების რეალიზაცია მოახდინო. ეს არ ნიშნავს იმას, რომ მუსიკას მანქანა ქმნის. მუსიკას შენ აკეთებ, მაგრამ ის უფრო ხელმისაწვდომია. რაღაცა პერიოდი მეც ვიყავი დაკავებული ასეთი მუსიკით. დღეს ადამიანს შეუძლია იჯდეს საკუთარ საძინებელში და მხოლოდ ლეპტოპის ან თუნდაც ტელეფონის საშუალებით მოახდინოს საკუთარი იდეის რეალიზაცია.

ევა ბაბალაშვილი - არის ასეთი ჰიტები?

სერგი გვარჯალაძე - რა თქმა უნდა! ახლა არ არის დაყოფა ელექტრონულ და სხვა ტიპის მუსიკაზე. ყველანაირი მუსიკა, რომელსაც ჩვენ ვუსმენთ, კომპიუტერზეა დამუშავებული.

ევა ბაბალაშვილი - ესე იგი, ცოცხალი მუსიკა და ცოცხალი შესრულება იკარგება?

სერგი გვარჯალაძე - არა, მე ვფიქრობ, რომ ის იღებს სხვა ფორმას, რადგან მუსიკის სული ყოველთვის იარსებებს. ექსპერიმენტალური მუსიკა დღეს ძალზე მნიშვნელოვანია. როდესაც დაჯილდოებას ვიწყებდით, მაშინ მხოლოდ 20 მუსიკოსი იღებდა მონაწილეობას. წელს 107 არტისტი მონაწილეობდა, რომელთა უმრავლეოსაბაზე არაფერი მსმენია. კიდევ ძალიან მახარებს, რომ ამ მუსიკით ბევრი ქალი დაკავდა.

ევა ბაბალაშვილი - იმის გარდა, რასაც ახლა აკეთებ, კიდევ რის გაკეთებას ისურვებდი? რა გიზიდავს? რაზე ოცნებობ?

სერგი გვარჯალაძე - მე არ ვოცნებობ არარეალურზე. ამჟამად ძალიან ინტენსიურად ვარ დაკავებული იმით, რომ მინდა გავაკეთო კარგი კინომიუზიკლი ბავშვებისთვის. მე მივხდი, რომ ძალიან ცოტაა კარგი მუსიკა და კარგი მუსიკალური ფილმი ბავშვებისთვის, განსაკუთრებით ქართული.

ევა ბაბალაშვილი - რას ურჩევდი ჩვენს ახალგაზრდობას? როგორ იპოვონ საკუთარი თავი?

სერგი გვარჯალაძე - ვფიქრობ, რომ ნებისმიერი თაობის ახალგაზრდობისთვის მნიშვნელოვანია, რომ არასდროს აიღონ ორიენტირი რაღაც ავტორიტეტებზე, ეცადონ გაანგრიონ კედელი, არ დაემსგავსონ სხვებს, არ ეშინოდეთ გარისკვის, იმიტომ რომ რისკი ყოველთვის წარმატების ნაწილია. ძალიან მნიშვნელოვანია არსებული გამოცდილების შესწავლა.

ევა ბაბალაშვილი - ეს არ შეუშლის ხელს საკუთარი „მე“-ს გამოხატვას?

სერგი გვარჯალაძე - შეუძლებელია გააკეთო რაღაც ახალი, თუ არ იცნობ ძველს. თუ ჯაზური კომპოზიციის სტანდარტები არ იცი, ახალს ვერ გააკეთებ, რადგან ყოველთვის უნდა დაეყრდნო საუკეთესო მაგალითებს და მათ შეცვლას ეცადო. და კიდევ ძალიან მნიშვნელოვანია - გიყვარდეთ ერთმნანეთი.

ევა ბაბალაშვილი - ისწავლეთ, გაეცანით ცნობილი ადამიანების ცხოვრებას და ნუ გეშინიათ საკუთარი თავის პოვნის. ეს იყო გადაცემა „წახნაგები“ ევა ბაბალაშვილთან ერთად და ჩვენი სტუმარი იყო სერგი გვარჯალაძე. დიდი მადლობა!